"Most of the greatest evils that man has inflicted upon man have come through people feeling quite certain about something which, in fact, was false." Bertrand Russel (1870-1970)
مقالاتنا باللّبناني... لأنّو موقعنا لبناني... وهيدا أوّل مقال! "عم فكّر إرجع" متل المافيا حكمونا، وجوايز أوسكار ربحو لأنّو مثّلو علينا وغشّونا معقول بنيرون وروما يذكّرونا وشي يوم يحرقونا؟ القصّة قصّة كراسي ومنّها إلاّ بالوراثة! شو بيفكّر السياسي ببلدنا: عالدولار بينسى بيّو وإمّو، وبضرب تجارة ببيع خيّو وعمصلحتو بيركض حتّى لو سكّر تمّو وأهمّ شغلة إنّو الشعب يلّي انتخبو دايماً آخر همّو! ما رح عدّ السنين، لأنّو العدّ ما بقا يفيد، والأرقام بالغربة ما إلا معنى وما بتفرق مين ضدّنا ومين معنا...
عم بكتب هالمقال أنا وبالغربة، والدمع ما عم يطلع على عيوني، عم بيغرّقلي قلبي والمشكلة إنّو حتى ببلدي، الشعور نفسه: "الغربة" البحر سمّمو، الهوّا غيّرو، الطرقات كسّرو، جيوبنا نهبو، وضرايب فرضو معارضة أو موالاة ما همّن مين عاش ومين مات وشغلتن الأزمات!
وبتعرفو لي عم فكّر إرجع؟ لأنّو صار وقت الشعب يحكم! يلّي تخرّج من جامعتو بالرياضة يكون وزير الشباب، ولّي شهادتو حسابات، يكون وزير ماليّة ولّي درس طبّ يكون وزير صحّة.... أومو نحضّر غراضنا ونرجع وما تخافو منّن، أومو نصرخ سوا ونحنا نحكمن... وصدّقوني، لمّا صليبنا يكون حدّ هلالنا، فينا نزيحن، نحكمن، ونرعبن! لبنان إلنا مش إلن! وبالمقال الثاني بشوفكن!
